Rruga Remzi Ademaj 4

Ndërmarrja shoqërore Kinemaja Bistrica/Lumbardhi u hap me 1 shkurt 1952, me një hapësirë prej 700 ulësesh. Kinemaja ishte kryesisht e famshme për shfaqjen e filmave antifashist dhe Western. Në më pak se një dekadë, ajo u bë një nga kinematë e vetme në Ballkan me sallë të mbyllur dhe të hapur. Së bashku me Kinemanë Punëtori (Kino Radnik), kinematë kishin një qarkullim mbi 500,000 bileta në vit.

Në vitet 1990, me shfaqjen e video klubeve dhe video kasetave VHS, dhe rënien e bashkëpunimit politik në vend, kinemaja përjetoi një rënie të interesimit dhe ndërpreu aktivitetin e saj tre ditë para bombardimeve të marsit 1999. Pronësia e saj më vonë kaloi në Agjencinë Kosovare të Privatizimit, duke e lënë kështu qytetin pa një kinema të vetme. Iniciativa dhe kërkesa nga komuniteti lokal për ringjalljen e Kino Lumbardhit u zhvillua gjatë edicionit të parë të festivalit të filmit dokumentar DokuFest në vitin 2002.

Në vitin 2007 kryetari i Komunës së Prizrenit shpalli vendimin për prishjen e kinemasë në mënyrë që të ndërtohej një parking i ri. Si kundër-përgjigje, komuniteti kulturor i qytetit nisi iniciativën për mbrojtjen e Kinemasë Lumbardhi dhe pas një beteje të gjatë, Kinemaja Lumbardhi u hoq nga lista e privatizimit dhe u vendos në listën e trashëgimisë kulturore nën mbrojtje.