Për një muaj e gjysmë, çdo të dielë, Autostrada Biennale ka hapur dyert për fëmijët dhe familjet. Programi ynë i dedikuar fëmijëve u bë një hapësirë ku loja, krijimtaria dhe arti u takuan natyrshëm, duke i dhënë çdo të diele një kuptim të veçantë.

Gjatë këtyre javëve, fëmijët morën pjesë në punëtori të ndryshme, me lojëra dhe aktivitete që ushqyen imagjinatën e tyre, zhvilluan aftësi të reja dhe mbi të gjitha u afruan me artin bashkëkohor. Përveç kësaj, ata patën mundësinë të shohin nga afër ekspozitat e edicionit të pestë të Autostrada Biennale, kuruar nga Erzen Shkololli dhe titulluar Rrymat që shpalosen: Pulsi i kohës.

Ndikimi i këtyre ditëve të diele nuk qëndron vetëm në kujtimet e bukura të lojës, por edhe në mënyrën se si fëmijët mësojnë të bashkëpunojnë, të shprehin idetë e tyre dhe të rriten si pjesë aktive e një komuniteti që vlerëson kulturën dhe krijimtarinë.

Falënderim i veçantë shkon për të gjithë fëmijët që morën pjesë, për prindërit e tyre që i mbështetën, për Edis Galushin i cili me përkushtim dhe ndjeshmëri udhëhoqi punëtoritë, si edhe për stafin e Autostrada Biennale që bëri të mundur çdo detaj.

Me këtë kapitull të përfunduar, mbajmë me vete bindjen se edukimi përmes artit është një nga dhuratat më të çmuara që mund t’u japim brezave të rinj.

Foto: Tughan Anit