Punëtoritë krijuese për fëmijë në Autostrada Hangar sjellin mësim përmes krijimit

Studio e Edukimit në Autostrada Hangar është shndërruar në një hapësirë ku fëmijët mësojnë duke krijuar, eksperimentuar dhe bashkëpunuar. Përmes punëtorive krijuese, ata kanë pasur mundësinë të punojnë me dru dhe pajisje profesionale të certifikuara sipas standardeve evropiane të sigurisë për përdorim nga fëmijët, duke i kthyer idetë e tyre në krijime konkrete.

Gjatë punëtorive, fëmijët kanë projektuar dhe ndërtuar lodra e forma të ndryshme prej druri, duke kaluar hap pas hapi nga ideja deri te realizimi. Në të njëjtën kohë, ata kanë zhvilluar aftësi praktike, kanë punuar në grup dhe kanë mësuar rëndësinë e bashkëpunimit, kreativitetit dhe zgjidhjes së problemeve.

Programi është ndërtuar mbi parimet e STEAM (Shkencë, Teknologji, Inxhinieri, Art dhe Matematikë), duke u ofruar fëmijëve një përvojë praktike që nxit të menduarit krijues dhe kritik, koordinimin sy–dorë, përqendrimin dhe vetëbesimin.

Në një kohë kur fëmijët kalojnë gjithnjë e më shumë kohë para ekraneve, këto punëtori krijojnë një hapësirë ku imagjinata, dora dhe mendimi punojnë së bashku. Çdo krijim është rezultat i procesit të të mësuarit, eksperimentimit dhe kënaqësisë së ndërtimit me duart e tyre.

Autostrada Hangar do të vazhdojë të zhvillojë programe edukative që fuqizojnë kreativitetin e fëmijëve dhe i afrojnë ata me proceset e dizajnit, teknologjisë dhe artit përmes përvojës së drejtpërdrejtë.

Aplikoni këtu!

Falënderojmë BENMAKER për bashkëpunimin dhe mbështetjen në realizimin e këtij programi.